Apple耳機清潔 | 相信好多人都會用耳機聽歌，每日聽歌嘅同時，原來耳機都暗藏唔少細菌同污垢！大家又有冇定期清洗呢？如果用開AirPods、AirPods Pro、AirPods Max同EarPods聽歌嘅朋友，就可以學習Apple官網所教嘅清潔方法！
圖片來源：官方網站、Freepik | 撰文：Hedy
如果想簡單為耳機清潔，就可以揀選酒精濕紙巾嚟消毒。當中Apple更建議大家最好用70% 異丙醇酒精濕紙巾、75% 乙醇酒精濕紙巾或高樂氏 Clorox 消毒濕紙巾去輕拭AirPods、AirPods Pro、AirPods Max或EarPods嘅外部表面。抹嘅時候記得要避開揚聲器網罩以及 AirPods Max 嘅網織頂篷同耳罩軟墊，同時都要避免用使用漂白水或過氧化氫嘅產品。
Apple耳機清潔 | 1. 清潔AirPods同AirPods Pro
iPhone用家絕對唔少得用AirPods或者係AirPods Pro，細細部又方便攞出街聽歌。但如果長期配戴，耳垢會容易積聚喺聽筒位置，只需要1個鐘含菌量就已經高達700倍，相當驚人！想為耳機清潔，就絕對要學識正確方法，無論係清潔AirPods、AirPods Pro以及EarPods都適用！
稍微沾濕清水嘅布將機身抹乾淨
再用柔軟、乾爽、不起毛絮嘅布擦乾
使用乾棉花棒清潔咪高風和揚聲器網罩
待耳筒完全乾後先放入充電盒
耳機都要記得清潔！（圖片來源：Freepik）
清潔完機身之後，都要將耳塞清潔埋。如果耳塞積水，就要將耳塞嘅開口向下，喺柔軟、不起毛絮嘅乾布上輕拍 AirPod去除水分。將每邊AirPod 取出耳塞，用清水將耳塞沖洗乾淨，千祈唔好用番梘或其他家居清潔劑！沖洗後同樣以乾布抹乾耳塞，待耳塞乾透之後先再重新放入每邊嘅AirPod。
耳塞都要清潔好～（圖片來源：Freepik）
當清潔充電盒嘅時候，同樣都要用乾布去清潔，如果發現Lightning接頭有碎屑，就可以使用潔淨嘅乾軟毛刷。有需要嘅情況下，更可以用消毒火酒稍微沾濕抹布，最後記得一定要等充電盒風乾！
Apple耳機清潔 | 2. AirPods Max點清潔？
AirPods Max頭戴式無線藍芽耳機相當受年輕人歡迎，不過體積相對於AirPods嚟講較大，喺清潔上面步驟都會比較繁複，所以Apple官方都有教大家點樣清潔。由於長期使用耳機可能會藏有耳垢、纖維以及毛髮等等，一定要清潔好AirPods Max嘅耳墊同頭帶！
簡單7步清潔AirPods Max（圖片來源：官方圖片）
喺乾淨嘅容器中，將1茶匙 (5 毫升) 洗衣液與1杯 (250 毫升) 清水混合
從耳罩上取下耳墊
清潔頭帶時，採用上下倒轉嘅方式攞AirPods Max，以免液體流入頭帶嘅接合點
將不起毛絮嘅布浸入番梘水溶液，然後將布輕輕擰乾，再用布喺耳墊同頭帶上輕力擦拭各1分鐘
使用另一塊微微沾濕清水嘅布將耳墊和頭帶擦拭乾淨
使用不起毛絮嘅乾布將耳墊和頭帶抹乾，確保去除多餘水份。
將AirPods Max平放風乾最少一日，然後先重新裝上耳墊並使用耳機。
有需要都可以用消毒火酒沾濕抹布清潔（圖片來源：官方圖片）
就連清潔AirPods Max護殼嘅時候，都一定要用柔軟、不起毛絮嘅乾布清潔智慧型耳筒套。如果有需要，都可以使用消毒火酒稍微沾濕抹布，最後再等佢風乾。
延伸閱讀：【教你4招清潔AirPods！用1小時細菌激增700倍 耳筒+充電盒超多污垢！】
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
Tags :
AirPodsAirPods MaxAirPods Pro清潔耳機無線耳機清潔耳機清潔sauce焦點sauce電子
HedyCheng
04/05/2024
